Urkunde 1380 Mai 15

Urkundentext

15. Mai 1380:
Pröbstin, Dechantin und übrige Jungfrauen des Kapitels der Essener Stiftskirche überlassen die Hälfte des neuerworbenen Gutes zu Stoppenberg der Münsterkirchenfabrik.
Wy Aleyd van Wildenberg, proystynne, Elzebe van Aldenhoven, dekensche, und ghemeyne joncjrouwen des capitels der wertliken kerken to Essende doyn kont allen luden, die desen brief seyn ofte horen lesen, dat wy den koyp, des wy ons annamen hadden, van der helfte van deym gude to Stopenberghe, deym werke unser kerken, dat gehegten is Unser Vrouwen werck, uplaten willen und uplaten in desen openen brieve um gunst, die wy hebben to nut und urber unser kerk, und wy oick dat gelt, dat wy um die helfte von desen voirschreven gude geven und betalen solden, sunder kummerliken schaden und grote kost nicht gewerven en kunnen, also dat wy uns des kopes uteren, des wy uns annamen hadden, und taten Unser Vrouwen werk unser kerken gayn in den koyp, voir die summe geldes, als wy dey koyp annamen hadden; und up dat dese koyp Unser Vrouwen wercke unser kerken vaste und stede sy, so drage wy den koyp und den brief, die up den koyp gemaket is, den Johan van der Dorneborgh, geheiten Asschebroyck, und Engelbrecht Sobbe und dat gerichte van Essende besegelt hebben, sementlick und eyndrechtlick Unser Vrouwen werke unser kerken up voir unser erwerdigen vrouwen, vrouwen Elizabet van Nassauwen, ebdissen unser wertliken kerken, und vertyen up den koyp in behuyf Unser Vrouwen werkes unser kerken, dat guyt erflick und ummermeir to hebben und to besitten. Voirtmer bekenne wy in desen selven openen brieve, dat Unser Vrouwen werk unser kerken uns dat gelt degher und altemail gegeven und gehantreyket hevet, dat uns an den werke brake was van des voirscreven kopes und gudes wegen, al argelist und nye vunde buten bescheden; to tuyghe der warheit aller voirscreven punte, so hebbe wy unses capittels segel an desen brief gehangen und to meirre sekerheit so hebbe wy gebeden unse lieve vrouwe die ebdisse voirscreven, Johan van der Dorneborgh, Rutger van Aldendorp und Henrick von der Knyppenborgh, dat se er segele to unses capittels segel an desen brief hebben gehangen; und wy Elizabet ebdisse bekennen, dat dese voirscreven punte voir uns geschient syn, dair um so hebbe wy um bede willen unser jonfrouwen unse segel mede an desen brief gehangen, und wy Johan, Rutger und Henrick voirscreven bekennen, dat wy al dese voirscreven punte gesyen und gehoirt hebben und hebben um bede willen der vrouwen und jonfrouwen voirscreven unse segel to eirs capittels segel an desen brief gehangen.
Gegeven in deym jare unsers heren godes dusent dryhondert und achtentich des dynxdages na Pynxten.
Gleichzeitige Kopie. Rückvermerk: Copie vanm dem gude to Stopenberghe, dat Unser Vrouwen werck hevet. 1380.

Quelle

• Schäfer, Karl Heinrich: Urkunden und Akten des Essener Münster Archivs. In: Historischer Verein für Stadt und Stift Essen: Beiträge zur Geschichte von Stadt und Stift Essen. Bd. 28. Essen 1906 . S. 22 f. Nr. 37