Urkunde 1349 Juni 6
Urkundentext
6. Juni 1349
Engelbrecht Graf von der Mark versetzt dem Rutger von der Dorneburg für zweihundert Mark die Pannen zu Bochum und die Vogtei des Hofs zu Heidringhausen im J. 1349
Wy Engelbreicht Greue van der Marke doint kund allen luden dat wy bi rade onser vrunde ind vulborde al onser rechten eruen hebben gesat ind setten Rutghere van der Daerneborch ind sinen rechten eruen onse Pannen tho Boecheim ind de vogedie des houes tho Heldrinchusen[1] mit aller thobehoringe ind mit aller slachter nut also als de onse sint vur twehundert marc gudes geldes einen guden alden groeten vur veir penninge getailt oft syn gewert mit alsulchem vnderscheide dat wy ind ons eruen de vurg Pannen ind vogetdie van Rutgheren ind van sinen eruen allewege mugen wedeloissen vur de vurg tsummen geldes Ind dat gelt sulen wy oen betalen tho Dortmunde binnen der Staet vnbesat ind vnbecummert.
Alle dese vurg stucke ind dat wy Rutgeren ind syn eruen halden sulen in der vogetdie ind Pannen vredelike bis wy oem ind syn eruen dit vurs gelt geuen als vurs is sekeren ind louen wy Rutgere ind sinen eruen vaest ind stede tho halden aen al argelyst Ind hebben des tho orkunde onse segel doin hangen aen desen breit
In dem Jaere ons herin als men screif dusent dreihundert Negen ind veirtich Jaer des Saterstages na Pinkesten
Literatur
- Strange 1868, S. 50f.
